«TIMSS-2019 халықаралық зерттеуі» жүргізілуде.

Ағымдағы жылдың 3-4 мамыр күндері Жамбыл облысында 4 және 8 сынып оқушыларының математика және жаратылыстану ғылымдары бойынша білім сапасын бағалау мақсатында TIMSS-2019 халықаралық зерттеуі Байзақ ауданы, Жамбыл атындағы орта мектебі мен Н.Киікбаев атындағы мектеп-гимназиясында, Мойынқұм ауданы В.Терешкова атындағы шағын жинақталған мектебінде өткізілді. Халықаралық зерттеу барысында оқушылардан математика-жаратылыстану бағыты бойынша тест тапсырмалары мен сауалнамалар алынды. 4 сыныптың ата-аналары сауалнамаға қатысты.  Зерттеуге барлығы 93 оқушы қамтылды.

«Оқытуды жоспарлаудағы оқу мақсаттары мен әдіс-тәсілдер сабақтастығы» тақырыбында  облыстық семинар-практикум өтті

        Облыстық оқу-әдістемелік кабинетінің ұйымдастыруымен 2019 жылдың               4 мамырында Жамбыл ауданы, Ю.Гагарин атындағы мектеп-лицейінің базасында қазақ тілі мен әдебиеті пәнінің мұғалімдеріне жаңартылған білім мазмұны аясында оқытуды жоспарлауда оқу мақсаттары мен әдіс-тәсілдерді тиімді жолдарын анықтау арқылы әдістемелік көмек беру мақсатында «Оқытуды жоспарлаудағы оқу мақсаттары мен әдіс-тәсілдер сабақтастығы» тақырыбында облыстық семинар-практикум өткізілді.

Аталған  іс-шараға  қазақ тілі мен әдебиеті пәні мұғалімдері, білім  бөлімдерінің  пәнге  жауапты  әдіскерлері, барлығы 52 педагог қатысты.

Семинар-практикум барысында пән мұғалімдері  оқу мақсатына  жетуді қамтамасыз ететін бағалау критерийлері мен дискрипторды құрастыру барысында түрлі әдіс-тәсілдермен  алмасты. Оқушылардың шығармашылық қабілеттерін дамыту  мақсатында тәжірибелік сабақтар өтілді.

Облыстық «Латын графикасына көшу жағдайындағы қазақ тілі әліпбиі: тарихы, құрылымы және емлесі» тақырыбындағы мұғалімдер арасында эссе жазу байқауы өтті

Жамбыл облысы әкімдігінің білім басқармасының оқу-әдістемелік кабинетінің ұйымдастыруымен 2019 жылдың 30 сәуірінде қазақ тілі әліпбиін латын графикасына көшіру жөніндегі ұлттық комиссия мақұлдаған жаңа әліпби негізіндегі қазақ тілі емлелерін (әріптердің емлесі, түбір сөздердің емлесі, қосымшалардың жалғануы, бөлек жазылатын сөздердің емлесі, бірге жазылатын сөздердің емлесі, дефиспен жазылатын сөздердің емлесі, бас әріптің емлесі,  қысқарған сөздердің емлесі, кейбір кирилл әріптері мен шеттілдік сөздер, сөздердің тасымалдануы) және қазақ тілі мен әдебиеті пәні мұғалімдерінің  эссе жазу талаптарын меңгергендігін анықтау мақсатында эссе жазу байқауы өткізілді.

«Латын графикасына көшу жағдайындағы қазақ тілі әліпбиі: тарихы, құрылымы және емлесі» тақырыбындағы мұғалімдер арасында эссе жазу байқауына аудандық (қалалық) білім бөлімдері мен облыстық білім басқармасына қарасты білім мекемелерінен 32 мұғалім қатысты.

Облыстық «Ең үздік кітап оқитын мектеп»  атты байқауы өтті 

          Облыстық «Ең үздік кітап оқитын мектеп» атты байқауы 2019 жылдың 3 мамырында  Тараз қаласы №39 мектеп-гимназияның базасында өткізілді. Байқаудың мақсаты - оқушылардың кітап оқуға қызығушылығын арттыру арқылы интеллектуалды қабілетін дамыту, кітап оқуды насихаттау.

  Байқау   «ХХІ ғасыр кітапханашысы»,  «Кітапхана-Оқырман елі»,

«Оқитын мектеп – табысты мектеп»,  «Ізден, талаптан оқырман!» номинациясы бойынша өткізілді.

Байқауға  білім    беру      ұйымдарынан   11    мектептен   71   оқушы, 11  кітапхана қызметкерлері қатысып, 7  мектеп жүлделі орындарға иеленді.

Бас жүлдені - Тараз қаласы   №22  орта мектебі, 1-орынды  Талас ауданы мектеп-лицейі, 2-орынды Жамбыл  ауданы Ю.Гагарин атындағы мектеп-лицейі, 3-орынды Меркі ауданы  №1 жалпы орта білім беретін мектебі иеленді. Байқауға қатысқан мекемелер облыстық білім басқармасының   дипломдарымен, қатысушы сертификаттарымен және алғыс хаттарымен марапатталды.