«Қазіргі білім беру жағдайында бастауыш мектепте оқу-тәрбие үдерісін ұйымдастырудың әдістемесі» тақырыбында облыстық оқыту семинары өтті

Жамбыл облысы әкімдігі білім басқармасының оқу-әдістемелік кабинеті 2023 жылдың 20 қазан күні бастауыш сынып мұғалімдерінің кәсіби қызметінде жоғары нәтижелерге жетуге ұмтылысын жетілдіру мақсатында «Қазіргі білім беру жағдайында бастауыш мектепте оқу-тәрбие үдерісін ұйымдастырудың әдістемесі» тақырыбында онлайн режимінде семинары өтті.
Аталған іс-шараға аудандық (қалалық) білім бөлімдерінің әдіскерлері мен бастауыш сынып мұғалімдері, барлығы 217 педагог қызметкер қатысты.
Іс-шара барысында мемлекеттік аттестациядан өтетін және «1000 мектеп» жобасына енген жалпы орта білім беретін мекемелердің бастауыш сынып мұғалімдері білім беру жүйесіндегі жүргізу үшін міндетті құжаттардың тізбесі, сабақты жоспарлау және мұғалімнің дайындалу кезеңдері, табысты сабақ жоспарының критерийлері, бастауыш сынып оқушыларының функционалдық сауаттылығын дамытуға арналған тапсырмалар үлгілері бойынша тәжірибе алмасты. Семинар соңында қатысушылар электронды таратпалы материалдармен қамтамасыз етілді.

Облыстық тәжірибе алмасу семинары өтті
Жамбыл облысы әкімдігі білім басқармасы оқу-әдістемелік орталығының ұйымдастыруымен 2023 жылдың 20 қазан күні Тараз қаласы, № 25 орта мектептің базасында «Бастауыш сыныптарда инклюзивті білім беру жағдайында оқу процесін ұйымдастыру» тақырыбында тәжірибе алмасу семинары өтті. Аталған іс-шараға 40 педагог қатысты. Семинар барысында мектеп базасындағы білім алып жатқан оқушылармен жұмыс жасайтын дефектолог мамандардың, педагог-ассистенттің жұмысымен танысып, тәжірибе алмасу сабақтары көрсетілді. Ресурстық орталықтың жұмысы көрсетіліп, ерекше білім беруді қажет ететін балалармен жұмыс жасайтын арнайы мамандардың оқу жоспары мен оқу бағдарламаларын білім берудегі мазмұнға қарай өзгерту, бағалау тәсілдері түсіндірілді.

«СабақTime» жобасы аясында «География пәнін оқытудың ерекшеліктері мен қолданылатын әдіс-тәсілдер» атты облыстық ашық сабақтар циклі өтті

Оқу-әдістемелік орталығының ұйымдастыруымен 2023 жылдың 20 қазан күні облыстық тәжірибелі география пәнінің педагогтері Байзақ ауданы, Көктал орта мектебінің базасында ашық сабақтар өткізді.
Іс-шараның теориялық бөлімінде «География пәнін оқытудың ерекшеліктері мен қолданылатын әдіс-тәсілдер» тақырыбында пәнді оқытудағы негізгі мәселелері мен білім сапасын арттырудың тиімді жолдары, жалпы географиялық заңдылықтары туралы білімді дамыту бағытында қолданылатын оқытудың белсенді әдістері, оқушылардың жаратылыстану сауаттылығын арттырудың жолдары, білім сапасын арттыру бағытында жүргізілетін тиімді әдіс-тәсілдердің бағыттары көрсетілді.
Іс-шара барысында педагогтер ашық сабақтарға қатысып, оқыту үдерісінде оқушылардың білім сапасын арттырудың жолдары бойынша тәжірибе алмасты.
Аталған іс-шараға 47 педагог қатысты.

Жамбыл облысы әкімдігі білім басқармасының оқу-әдістемелік орталығының ұйымдастыруымен Қазақстан Республикасы Оқу-ағарту министрлігінің 17.08.2023 жылғы №5-04/4977 хатына сәйкес, 2023 жылдың 20 қазан күні білім беру ұйымдарындағы мектепалды сынып педагогтеріне арналған “Біртұтас тәрбие бағдарламасы: құндылықтар және оны іске асыру жолдары» тақырыбында әдістемелік семинары өткізілді. Аталған іс-шараға 67 педагог қатысты.
✅Іс-шара барысында оқу-тәрбие процесін ұйымдастыруда білім беру ұйымдарындағы 2023-2024 оқу жылында жүзеге асырылатын тәрбие жұмысының беталысын, құндылықтар негізінде тәрбие жұмысын ұйымдастыру ерекшеліктерін, білім алушылардың бойында құндылықтарды пәндік мазмұн, сынып сағаттары мен сыныптан тыс әлеуметтік тәжірибелер арқылы дарытудың әдіс-тәсілдерін меңгеріп, өзара пікір алмасып, ойларын ортаға салып, ертеңгі ұрпақты жан-жақты үйлесімді дамыған тұлға етіп тәрбиелеудің тиімді жолдарын талқылап, біліктілін арттырды. Білім беру ұйымдарының барлық тәрбие жұмысының мазмұнында ұлттық мүдде, ар-ұят, талап сияқты құндылықтар көрініс табуы қажеттілігін атап, жалпыадамзаттық және ұлттық құндылықтар тұла бойына шоғырланған жеке тұлға тәрбиелеу мақсатында қатысушыларға тәрбие процесін ұйымдастырудың ерекшеліктері мен тиімділігін арттырудың жолдары бойынша түсіндіру жұмыстары жүргізілді.