БАСТЫ БЕТ

Облыстық әдістемелік семинар өтті

2026 жылдың 29 қаңтар күні «Шығармашылық зертхана» жобасы аясында «Мұғалімдердің кәсіби құзыреттілігін дамыту: коучинг, менторинг және әдістемелік қолдау технологиялары» тақырыбында облыстық әдістемелік семинары өтті. Семинарға 150-ден астам директордың оқу, ғылыми-әдістемелік істері жөніндегі орынбасарлары мен шығармашылық топ мүшелері қатысты. Семинар барысында Р.Бабижанова Меркі ауданы, №5 Ақарал мектеп-гимназиясы, М.Мынбаева Жамбыл ауданы, Б.Момышұлы атындағы мектеп-гимназиясы, А.Піспекбаева Сарысу ауданы, Ақтоғай орта мектебінің директордың орынбасарлары «Ғылыми жобалық жұмыс – мектеп оқушыларының зерттеушілік қабілеттерін жетілдіру құралы», «Менторинг арқылы көшбасшы болу: Болашақтың көшбасшыларын тәрбиелеу», «Білім беру сапасын арттырудағы менторинг жүйесінің маңызы» тақырыптарында баяндамалар ұсынды. Білім беру ұйымының әдіскер қызметін ғылыми-әдістемелік тұрғыда талдау, бағалау, көмек көрсету, мектептердегі ғылыми-әдістемелік жұмыстардың жандануына педагогикалық ықпал ету, оқу-тәрбие үрдісінің деңгейін көтеруді әдістемелік тұрғыда қамтамасыз ету, мұғалімдер мен оқушыларды ғылыми-зерттеушілік шығармашылық жұмыстарға баулу, ынталандыру жұмыстарын жандандыру бойынша ақпараттық-әдістемелік көмектер беріп, өзара тәжірибе алмасты.

«Ғылым мен құндылық: адал азамат қалыптастырудағы жаратылыстану пәндерінің рөлі» тақырыбындағы облыстық тәжірибелік алаңы өтті

Жамбыл облысы әкімдігі білім басқармасының оқу-әдістемелік орталығы ұйымдастыруымен 2026 жылдың 29 қаңтар күні химия сабағында ғылыми мазмұн мен «Адал азамат» бағдарламасындағы құндылықтарды ықпалдастыру арқылы педагогтердің кәсіби құзыреттілігін арттыру, құндылыққа бағытталған оқытудың тиімді әдістемелік тетіктерін ұсыну мақсатында «Ғылым мен құндылық: адал азамат қалыптастырудағы жаратылыстану пәндерінің рөлі» тақырыбында облыстық тәжірибелік алаңы өтті. Іс-шараның теориялық бөлімінде адалдық, жауапкершілік, қауіпсіздік және экологиялық сана құндылықтарын химия пәнінің мазмұнымен кіріктіру жолдары талқыланып, жаратылыстану сауаттылығын дамытуға бағытталған өмірлік жағдаяттарға негізделген тапсырмалар, зертханалық жұмыстарды ұйымдастыруда қауіпсіздік пен академиялық адалдық мәдениетін қалыптастыру мәселелері қарастырылды. Ал, тәжірибелік бөлімінде workshop форматында құндылыққа бағытталған тапсырмалар құрастырып, оларды талқылады. Топтар адалдық, жауапкершілік, қауіпсіздік және экологиялық сана құндылықтарын пәндік мазмұнмен кіріктіре отырып, өмірлік жағдаяттарға негізделген тапсырмалар үлгілерін әзірледі. Әр топтың жұмысы талданып, тәжірибелік ұсыныстар мен әдістемелік қорытындылар жасалды. Іс-шараға аудандар мен Тараз қалалық білім бөлімдерінің әдіскерлері, химия пәнінің мұғалімдері, барлығы 65 педагог қатысты.

«Педагогтердің кәсіби шеберлігін арттырудағы әдістемелік жұмыстың тиімді жолдары» тақырыбында облыстық әдістемелік кеңес өтті

Жамбыл облысы әкімдігі білім басқармасының оқу-әдістемелік орталығының ұйымдастыруымен 2026 жылдың 16 қаңтар күні «Педагогтердің кәсіби шеберлігін арттырудағы әдістемелік жұмыстың тиімді жолдары» тақырыбында әдістемелік кеңес өтті. Облыстық іс-шара барысында әдістемелік жұмыстың негізгі мақсаты мен бағыттарына тоқталып, цифрлық білім беру платформаларын, интерактивті оқыту әдістерін қолдану, авторлық бағдарламалар мен жобалардың түрлерінің құрылымы, ерекшеліктеріне тоқталып, тиімді жолдары көрсетілді. Аталған іс-шараға география пәні әдіскерлері, барлығы 11 әдіскер қатысты.

«Инклюзивті білім беруді әдістемелік қолдау» тақырыбында облыстық әдістемелік кеңес өтті

Жамбыл облысы әкімдігі білім басқармасының оқу-әдістемелік орталығының ұйымдастыруымен 2026 жылдың 19 қаңтар күні инклюзивті білім беру үрдісін тиімді ұйымдастыру үшін әдіскерлерге әдістемелік қолдау көрсету мақсатында «Инклюзивті білім беруді әдістемелік қолдау» тақырыбында әдістемелік кеңес өтті. Іс-шара барысында инклюзивті білім беруді әдістемелік қолдау, арнайы және инклюзивті білім беруді дамыту бағытындағы іс-шараларға талдау, инклюзивті және арнайы білім беру саласындағы озық тәжірибелерді жинақтау және тарату, арнайы және инклюзивті білім беру саласындағы Республикалық оқу-әдістемелік кеңесі жүзеге асыратын сараптамалық бағалау Ережесі бойынша түсіндірме жұмысы жүргізіліп, ақпараттық әдістемелік қолдау көрсетілді. Іс-шараға 28 әдіскер қатысты.

БАСТАУЫШ СЫНЫП МҰҒАЛІМДЕРІНЕ АРНАЛҒАН РЕСПУБЛИКАЛЫҚ «АЛТЫН ТҰҒЫР» ОЛИМПИАДАСЫНЫҢ ОБЛЫСТЫҚ КЕЗЕҢІ ӨТТІ

Жамбыл облысы әкімдігі білім басқармасының оқу-әдістемелік орталығы «Зерделі» ақыл-ой дамыту мектептері Тараз қаласындағы филиалымен бірлесе отырып, 2026 жылдың 6 қаңтар күні Тараз қаласы №67 орта мектебінің базасында бастауыш сынып мұғалімдеріне арналған республикалық «Алтын тұғыр» олимпиадасының облыстық кезеңін өткізді. Олимпиаданың мақсаты – бастауыш сынып мұғалімдерінің кәсіби қызметінде жоғары нәтижелерге жетуге деген ұмтылысын арттыру, педагогтердің шығармашылық әлеуеті мен кәсіби шеберлігін дамыту, сондай-ақ мұғалім мамандығының қоғамдағы мәртебесін көтеру. Олимпиада үш кезеңнен тұрды: 1.«Дұрыс жауапты таңдау» – 10 сұрақтан тұратын тест тапсырмасы; 2.«Бос орынды толтыру» – қалдырылған бос орынға есептің жауабын жазу; 3.«Есептеу, дәлелдеу» – берілген есепті шығарып, нәтижесін дәлелдеу. Олимпиаданың облыстық кезеңіне барлығы 82 бастауыш сынып мұғалімі қатысып, нәтижесінде 37 педагог жүлдегер атанды. Атап айтқанда, І орын – 8 мұғалім, ІІ орын – 12 мұғалім, ІІІ орын – 17 мұғалім. Жеңімпаздардың ішінен 8 педагог республикалық кезеңге жолдама алды. Олимпиада қорытындысы бойынша қатысушылар арасында олимпиадалық және логикалық есептерді шешудің тиімді тәсілдері бойынша тәжірибе алмасу жүргізілді. Жүлдегер ұстаздарды жоғары нәтижелерімен құттықтай отырып, республикалық кезеңде сәттілік тілейміз!